‘रअ’का प्रमुख संगको भेटको सबैलाई भन्न मिल्दैन : प्र.म. ओली

काठमाडौँ । भारतीय गुप्तचर संस्था ‘रअ’का प्रमुख सामन्तकुमार गोयलबीचको भेटको विषयमा प्रधानमन्त्री केपी शर्माओलीले कुटनीतिमा सबै मान्छेसँग भेट्न हुने बताएका छन् । शनिबार एक टेलिभिजनलाई दिएको अन्तरवार्तामा प्रधानमन्त्री ओलीले गोयलसँगको भेटमा परराष्ट्रको प्रतिनिधि राख्दा ब्यूरोक्याटिक लेभलमा खुलस्त कुरा गर्न गाह्रो हुने बताए ।

प्रधानमन्त्री ओलीले भनेका छन्, ‘कुनै देशको कार्यकारी प्रमुखको प्रतिनिधिको रुपमा आएका व्यक्तिसँगको भेटमा कहिले–कहिले परराष्ट्रको प्रतिनिधि राखेर भेट गर्दा ब्यूराक्याटिक लेभलमा खुलस्त कुरा गर्न गाह्रो हुन्छ ।’ गोयलसँगको भेटमा आफूले केही मान्छे राखेको ओलीले दावी गरेका छन् । यद्यपि प्रधानमन्त्री ओलीले गोयलसँगको भेटमा कसलाई राखेको खुलाएका छैनन् । ‘मैले कुन प्रतिनिधि राख्ने कुन नराख्ने विचार गरेर प्रतिनिधि राखेको छु । सबैले नोट गरेको छ । परराष्ट्रमा समेत त्यसको रेकर्ड छ । गोप्य भेटवार्ता भएको होइन मानिसहरुको बीचमा भएको छ । को थियो थिएन, अहिले मैले भन्न जरुरी पनि छैन् । मेरो साथमा को–को बसेको थियो त्यो पनि भन्न जरुरी छैन्’ ओलीले भनेका छन् ।

दुई देशका बीचको सम्बन्ध बढाउन आवश्यक रहेकाले गोयलसँग भेट गरेको प्रधानमन्त्री ओलीको भनाइ छ । ‘अनाधिकृत मान्छेसँग भेट गरेको त होइन नि,’ प्रधानमन्त्री ओलीले भनेका छन्, ‘उताबाट तोकेर पठाएकै मान्छेसँग भेट गरेको हो ।’ सुटुक्क आएर अनेकले भित्रभित्र भेट्न हुने मैले भेट्न किन नहुने भन्दै ओलीले प्रश्न समेत गरेका छन् । उनले भने– ‘मैले त भेटेपछि बाहिर मिडियामा भेटघाट भयो भनेर जानकारी गराएँ ।’ राष्ट्रिय स्वाधिनतालाई सुदृढ गर्नको लागि भेटघाटको खबर बाहिर ल्याएको ओलीले बताए ।

गोयलसँगको भेटमा हाम्रो देशको हितको पक्षमा कुराकानी भएको छ । दुई देशको सम्बन्धलाई सुधार बनाउन भएको भेट सकारात्मक पक्ष रहेको ओलीले बताए । भारतीय खुफिया एजेन्सी ‘रअ’ का प्रमुख गोयल ५ कात्तिकमा नेपाल आएका थिए । गोयलले सोही दिन राति प्रधानमन्त्रीलाई भेटेर भोलिपल्ट बिहान दिल्ली फर्किएका थिए । गोयलसँग प्रधानमन्त्रीको भेटलाई लिएर सत्तारुढ नेकपाभित्रै पनि चर्को आलोचना भएको थियो ।

Tags

Related Articles

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Back to top button
Close