कीर्तिमानी १४ एमी अवार्ड ‘विडोज बे’ ले जित्यो

भाद्र ३०, २०८३ । द पिटले लगातार दोस्रो पटक उत्कृष्ट ड्रामा सिरिजको अवार्ड जित्दा, म्याथ्यु रिसले विडोज बेबाट (कमेडीतर्फ) र द बिस्ट इन मीबाट उत्कृष्ट अभिनेताको दोहोरो अवार्ड हासिल गरे । ह्याक्सकी जिन स्मार्टले लगातार पाँचौं पटक उत्कृष्ट कमेडी अभिनेत्रीको अवार्ड जितेकी छिन् ।

एप्पल टिभीको कमेडी–हरर सिरिज विडोज बेले उत्कृष्ट कमेडी सिरिजसहित १४ एमी अवार्ड जितेर नयाँ कीर्तिमान स्थापित गरेको छ । म्याथ्यु रिसले उत्कृष्ट कमेडी अभिनेता र लिमिटेड सिरिजमा उत्कृष्ट अभिनेता बन्ने ऐतिहासिक उपलब्धि प्राप्त गरे । ड्रामा विधामा द पिटले लगातार अर्को वर्ष पनि सिरिजको उपाधि जित्यो, जबकि रिया सिहोर्न, जिन स्मार्ट, र साली फिल्डले पनि उल्लेखनीय उपलब्धिहरू हासिल गरे ।

लस एन्जलसमा आयोजित ७८औं एमी अवार्ड्समा एप्पल टिभीको विडोज बेले इतिहास रच्यो । सोमबार राति भएको समारोहमा, सिरिजले सर्वाधिक १४ विधामा अवार्ड जित्दै रेकर्ड बनायो । न्यु इङ्ल्यान्ड टापुको पौराणिक कथा र आधुनिक कमेडीको सम्मिश्रण रहेको यो सिरिजले, म्याथ्यु रिसलाई व्यक्तिगत ट्रफीयुक्त ह्याट्रिक दिलायो । काटी डिप्पल्डले उत्कृष्ट लेखन र हिरो मुराईले उत्कृष्ट निर्देशनको अवार्ड पाएका छन् ।

एचबीओ म्याक्सको चर्चित मेडिकल ड्रामा द पिटले लगातार दोस्रो वर्ष उत्कृष्ट ड्रामाको उपाधि जित्यो । नोआ वाइलीले पनि लगातार दोस्रो पटक ड्रामा विधामा उत्कृष्ट अभिनेता बने । २५ विधामा नामांकित द पिटले मुख्य र प्राविधिक विधागत ६ अवार्ड मात्र जित्न सफल भयो । एप्पल टिभीको प्लुरिबसबाट रिया सिहोर्नले आफ्नो करियरकै पहिलो एमी अवार्ड जित्दै ड्रामा अभिनेत्री बनेकी छन् । ह्याक्सको पाचौं तथा अन्तिम सिजनमा जिन स्मार्टले लगातार पाँचौं पटक उत्कृष्ट कमेडी अभिनेत्रीको अवार्ड जितिन् ।

यससँगै उनी पाँच सिजनसम्म एमी जित्ने पहिलो कलाकार बनिन् । ७९ वर्षीय साली फिल्डले रिमार्केबली ब्राइट क्रिएचर्सका लागि लिमिटेड सिरिजमा उत्कृष्ट अभिनेत्रीको उपाधि जितेर उच्च आयुकी विजेता बनिन् । ७४ वर्षीय स्टिफन रुटले विडोज बेबाट उत्कृष्ट सहायक अभिनेता (कमेडी)को उपाधि प्राप्त गरे। केट ओफ्लीन पनि उत्कृष्ट सहायक अभिनेत्री बनीन् ।

एलिसन जेनीले द डिप्लोम्याटबाट उत्कृष्ट सहायक अभिनेत्री र टम पेलफ्रीले टास्कबाट उत्कृष्ट सहायक अभिनेता बने । सीबीएसबाट बन्द गरिएको द लेट शो विथ स्टिफन कोल्बर्टले उत्कृष्ट भेराइटी सिरिजको अवार्ड जित्यो, जहाँ कोल्बर्टले सीबीएस नेटवर्कप्रति व्यंग्यात्मक प्रतिक्रिया दिएका थिए । एनबीसीको प्रसारण उद्घाटनमा ल एन्ड अर्डर: एसवियू की मारिस्का हार्गिटेले सांगीतिक प्रस्तुति दिइन्, जसमा गायिका टेलर स्विफ्ट विशेष रूपमा उपस्थित थिइन् ।

हलिउड अभिनेता माइकल जे फक्सलाई बब होप ह्युम्यानिटेरियन अवार्डबाट सम्मानित गरियो ।