पत्रकार श्रेष्ठलाई बिनासर्त रिहा गर्न पत्रकार महासंघको माग

नेपाल पत्रकार महासंघले राष्ट्रिय स्वतन्त्र पार्टीका नेता तथा कलाकार हिमेश पन्तले साइबर ब्युरोमा दिएको उजुरीका आधारमा किशोर श्रेष्ठलाई पक्राउ गरिएको घटनालाई अस्वीकार्य ठहर गरेको छ ।

महासंघका अनुसार जनआस्था साप्ताहिकमा धादिङ जिल्लामा छिमेकीको दस रोपनी जग्गा हडपिएको विषयसम्बन्धी समाचार प्रकाशित भएपछि उक्त समाचारलाई लिएर उजुरी दर्ता गरिएको थियो । सोही उजुरीको कारण, प्रहरी टोलिले एसएसपी सन्तोष खड्काको नेतृत्वमा ललितपुरको नख्खुस्थित श्रेष्ठको निवासबाट उनलाई पक्राउ गरेको हो ।

महासंघले घटनालाई प्रेस स्वतन्त्रता तथा संविधानीक अधिकारविरोधी कार्यको रूपमा मूल्यांकन गरेको छ । साथै, प्रेस काउन्सिल नेपालको क्षेत्राधिकार मिच्दै राज्यसत्ताको समर्थनमा गरिएको स्वेच्छाचारी कार्यको निन्दा गरेको छ । यस्तो घटनाले लोकतान्त्रिक मूल्य र स्वतन्त्र प्रेसको विश्वव्यापी मान्यता खलल पुर्‍याएको महासंघको निष्कर्ष छ ।

महासंघका महासचिव रामप्रसाद दाहालले जारी गरेको विज्ञप्तिमा, समाचारसम्बन्धी कुनै विवाद भए कानूनी प्रक्रिया अवलम्बन गरेर टुँगो लगाउनुपर्ने र पत्रकार श्रेष्ठलाई तुरुन्तै बिना सर्त रिहा गर्नुपर्नेमा जोड दिइएको छ । साथै, प्रेस काउन्सिल नेपाललाई आफ्नो क्षेत्राधिकार प्रभावकारी रूपमा उपयोग गर्न आग्रह पनि गरिएको छ ।