सप्तकोशी नदीको जलसतह बढ्दै गएको छ।
आइतबार ६ बजेसम्म सप्तकोशीमा जल सतह ३ लाख ४२ हजार ६५ क्यूसेक पुगेको सुनसरीका सहायक प्रमुख जिल्ला अधिकारी जितेन्द्र कुमार यादवले जानकारी दिए। सप्तकोशीमा आइतबार बिहानको जलसतह यसपालिकै उच्च हो । जलसहत बढेपछि ४६ वटा ढोका खोलिएको सहायक प्रजिअ यादवले जानकारी दिए ।
साथै तटीय क्षेत्रमा रहेकाहरूलाई सतर्क गराइएको र प्रहरीबाट निरन्तर निगरानी गरिएको उनले बताए । बराहक्षेत्र नगरपालिका र कोशी गाउँपालिकामा नदी आसपासका वस्तीहरुमा सुरक्षित रहन भनिएको र अहिलेसम्म कुनै क्षति नभएको सहायक प्रजिअ यादवले बताए । सप्तरीका प्रमुख जिल्ला अधिकारी मेख बहादुर मंग्रातीले कोशी ब्यारेजका ५६ मध्ये ४६ वटा ढोका खोलिएको जानकारी दिए ।
‘रेडलाइटहरू बलिसकेका छन् । जोखिमयुक्त छ । प्रभावित क्षेत्रमा सुरक्षा सतर्कता अपनाउन स्थानीयलाई खबर पनि गरिसकेका छौं,’ प्रजिअ मंग्रातीले भने । सप्तरीको हनुमाननगर कंकालिनी नगरपालिका र तिलाठी कोइलाडी गाउँपालिका प्रभावित स्थानीय तह हुन् । ‘२ लाख क्यूसेक बढेपछि जोखिमयुक्त भनेका छौं । अहिले सतर्क गराइएको छ । स्थानान्तरण गर्नुपर्ने भयो भने विद्यालय र सामुदायिक भवनहरूमा राख्छौं,’ उनले भने ।
