हराएका र अज्ञात व्यक्तिहरूको शिक्षण अस्पतालमा फोटो र विवरणहरू सार्वजनिक

राजकुमार सुब्बा, भदौ १९, काठमाडौं गत भदौ १० गतेको विनाशकारी बाढीका कारण हराइरहेका तथा पहिचान नखुलेका व्यक्तिहरूको फोटो तथा विवरण त्रिवि शिक्षण अस्पताल,महाराजगन्जमा सार्वजनिक गरिएको छ ।

बाढीपछि सम्पर्कविहीन भएका र पहिचान हुन नसकेका मृत व्यक्तिहरूको फोटो र विवरण अहिले कान्ति बाल अस्पताल, शिक्षण अस्पताल, र शव गृह प्रवेश-द्वारमा टाँसिएको छ, जसले गर्दा आफन्त खोजिरहेका मानिसलाई आफ्नो प्रियजन पहिचान गर्न सजिलो होस् । साथै, हराएका व्यक्तिका आफन्तले खोजी कार्यलाई थप सजिलो बनाउन आफ्ना मानिसहरूको नाम र फोटो टाँस्न लगाएका छन् ।

टाँसिएका शवहरूमध्ये केही क्षत-विक्षत हुँदा पहिचान गर्न गाह्रो भएकोले अस्पतालले उपलब्ध जानकारी र विवरणहरू पनि राखेको छ ।